Որտեղից են հայտնվում երեխաները
Գրեթե ցանկացած ծնողի համար խնդիր է, երբ և ինչպես ասել երեխային, թե ինչպես են հայտնվում երեխաները։ 2.5-5 տարեկանն ընկած ժամանակահատվածում երեխան ամենայն հավանականությամբ տալիս է ձեզ այդ հարցը և դրան պատրաստ լինելը շատ կարևոր է: Այդ տարիքի երեխաները ցուցաբերում են հետաքրքրություն հղիության և տեսակի շարունակության մասին: Հոգեբանների կարծիքով մոտավորապես 4 տարեկանում երեխաները սկսում են գիտակցել, որ նորածինները պարզապես չեն հայտնվում ոչ մի տեղից, այլ կատարվում է ինչ-որ բան, որը նպաստել է այդ գործընթացին:
Փոքրիկ երեխաները մտածում են կոնկրետ և ուղիղ: Բացատրությունները՝ երեխան աճում է մայրիկի փորում, կարող է վախեցնել այն երեխաներին, որոնք փորը հիմնականում ասոցացնում են ուտելիքի հետ, ինչու հայրիկը, որը ևս ունի փոր, չի ծնում երեխա:
Այս հարցը կարծես թե մարտահրավեր է․ ինչպե՞ս պատասխանել։
Առաջին հերթին պարզեք, թե ինչ գիտի երեխան այդ մասին։ Այստեղ տեղին կլինի մի կատակ. Տղան գալիս է տուն և հարցնում հորը. ‹‹Որտեղի՞ց եմ ես հայտնվել››․ հայրը 15 րոպե բացատրում է անատոմիան և տեսակի շարունակման ընթացքը, այդ ժամանակ տղան անհամբերությամբ ընդհատում է հորը հետևյալ հարցով. ‹‹Հայրիկ մեր դասարանից մի տղա ասում է, որ նա այսինչ շրջանի այսինչ գյուղից է, իսկ ես որտեղից եմ››: Այլ կերպ ասած՝ համոզվեք, որ ճիշտ եք հասկացել ձեր երեխայի հարցը: Կարելի է ճշտել հետևյալ կերպ. ‹‹Ի՞նչ ես ինքդ մտածում, ինչպես ես հայտնվել›› կամ ‹‹Նկատի ունես, թե որտեղ ենք մենք ապրել միչև քո ծնվելը››, կամ ‹‹Ուզում ես լսել պատմությունը այն մասին, թե ինչպես ես դու ծնվել››:
Երկրորդը՝ հիշեք այն արժեքները, որոնք դուք ցանկանում եք փոխանցել ձեր երեխային: Օրինակ՝ կարևո՞ր է արդյոք ձեզ համար ասել երեխային, որ սեռական հարաբերությունը կարող է լինել միայն ամուսնության ժամանակ, կամ հասանելի է միայն մեծերին: Երեխայի հետաքրքրասիրությունը տալիս է ձեզ այդ հնարավորությունը նման արժեքներով կիսվելու համար:
Երրորդը՝ սկսեք շատ պարզ հարցերից և տեսեք, հետաքրքիր է արդյոք երեխային շարունակել խոսակցությունը:
Օրինակ՝
Երեխա: Որտեղի՞ց եմ ես հայտնվել:
Ծնող: Դու հարցնում ես, որտե՞ղ ես դու ծնվել, թե այն մասին ինչպե՞ս են հայտնվում երեխաները:
Երեխա: Ինչպե՞ս են հայտնվում երեխաները:
Ծնող: Ինչ լավ հարց տվեցիր: Նորածինները ապրում են հատուկ վայրում՝ մայրիկի ներսում, որը կոչվում է արգանդ:
Երեխա: Իսկ ի՞նչ է նշանակում արգանդ:
Ծնող: Դե դա հատուկ տեղ է կնոջ ներսում, փորի նեքևում: Արգանդ ունեն միայն կանայք, դրա համար միայն նրանք կարող են երեխա ունենալ: Բայց հայրիկները ևս ունեն շատ կարևոր դեր, քանի որ օգնում են երեխայի բեղնավորման ժամանակ:
Կյանքը ցույց է տալիս, որ 3-4 տարեկան երեխաների մեծամասնությանը այսքան ինֆորմացիան բավարար է: Չզարմանաք, եթե նրանք գնան, մտածեն դրա մասին և վերադառնան նոր հարցերով: Իրականում հիանալի է, հիանալի է, երբ նրանք շարունակում են հարցեր տալ:
